Kutxabank Masters Txapelketa 2026 asteartean aurkeztu duten Galarretan berrikuntza aunitzekin. Zortzi erremontistak jokatuko dute txapelketa, ohiko lau partaideak bikoiztuz eta ondorengoak izango dira: Aritz Juanenea saldiastarra, Barrenetxea IV.a, Ansa II.a, Azpiroz, Josetxo Ezkurra II.a doneztebarra, Aldabe, Aimar Jabalera doneztebarra eta Larrañaga. 2025eko Buruz Buruko erremonte txapelketan zortzi lehenengo postuetan sailkatutako pilotariak dira.

2025ean hasi eta 2026ko martxoaren 28an Gipuzkoan, Amasa-Villabonan bukatuko den Euskal Herriko 17. Mus txapelketa abiatu da. Herriz herri jokatuko da lehen fasea otsailaren 22ra arte, herrialdeko finalak martxoaren 7an jokatuko dira zazpi herrialdeetan (Nafarroakoa Iruñeko Arrano elkartean eta Lapurdikoa Urruña-Pausuko Xaia ostatuan). Mus Federazioak, herrialdetako kanporaketen antolaketan parte hartzera deitu ditu mus zaleak. Gogoratu behar da joan den urtean 2.515 bikotek hartu zutela parte eta, denen artean, Jose Manuel Zabaleta eta Jose Miguel Gonzalez leitzarrak suertatu zirela txapeldun.