Joan den astean Nafarroako herri bateko bestetan eraso sexista pairatu zuen Berako neska batek. Berako Goldatz Emakume Taldeak, lehenik eta behin «bere babesa» adierazi nahi dio erasotuari eta bere inguru guziari, «zurekin gaude». Irmoki gaitzetsi nahi dute gertaturikoa eta Berako besten atarian gauden honetan, «argi dugu ez dugula inolako erasorik onartuko». Horregatik guziagatik, abuztuaren 1ean, larunbatean 20:00etan, kontzentrazioa eginen dute Mukixu zubian, «Erasoen aitzinean autodefentsa feminista!» goiburupean.

Abuztuaren 2an, igande eguerdian piztuko den txupinazoarekin abiatuko dira ofizialki Berako bestak. Baina San Jose Zahar Etxean aitzineratu eta uztailaren 31n, ortzirale goizean piztu dituzte lehen suziriak eta paratu dituzte lehen aldiz zapi gorriak. Erraldoi Konpartsak ere lehen dantzak egin ditu.