Eguraldi paregabearekin, Urdazubiko Ikaburuko Lezearen egunaren hamabigarren edizioa ospatu zuten uztailaren 18an eta, beti bezala, familia guztiarentzako jarduera ugarirekin. Lezean estalagmita eta estalaktitaz betetako mundu batean murgiltzeko aukera izan zuten, antzinako pertsonaia, kondaira eta kontrabando istorioekin. Aurten, berritasun gisa, Historiaurreko Bultzagailu Jaurtiketaren Txapelketa antolatu zuen Edestiaurre Arkeologia Elkarteak, Urdazubiko Udalaren laguntzarekin.

Asto gurdi gainean, zakuetan txukun jarrita ekarri zuten txondorgileek ikatza plazara. Salmenta mugatu zuten, buruko zaku bat, ahalik eta jende gehienari emateko aukera. Denera, 85 zaku saldu zituzten eta saldu gabe gelditu zenarekin aurrerago erabakiko dute zer egin.