Emakume Master Cup zirkuituaren barrenean Hiru Hiriburuak txapelketa abiatuko da irailaren 20an, igandean Gasteizen. Hain zuzen, Gasteizen egin zuten aurkezpena asteazkenean, hilaren 16an, eta Mendizorrotzako Beti Jai pilotalekuetako igandeko final laurdenetako jardunaldiaren ondotik, urriaren 4an finalerdiak jokatuko dituzte Donostiako Atano III.a historikoan eta finalak urriaren 11n Bilboko Bizkaia pilotalekuan. Nahia Bertiz sunbildarra (Salsamendirekin), Alize Sagardui goizuetarra (Bergararekin) eta Goiuri Zabaleta leitzarra (Mendizabalekin) izanen dira eskualdeko pilotariak.

Valdizarbe Xtrem mendi bizikleta proba egin zuten Garesen larunbatean, irailaren 12an, eta bertan Eneit Bertiz Apezetxea txirrindulari sunbildarra izan zen garaile. Bi ibilbide izan zituzten aukeran parte hartzaileek eta Bertiz 60 kilometro luze eta 1.800 metroko desnibela zuen proba luzean nagusitu zen.