Euskal Herriko herri anitzetan bezala udako solstizioa ospatu zuten ekainaren 23an Anizen ere. Urtero bezala, haurrak 17:30ean etxez etxe ibili ziren kartoi, periodiko eta belar idorra biltzen suak egiteko. Aurten gainera, haurrek egindako batzarre batean herriari eskaera bat egin zioten: su gehiago egiteko. Haurren batzarrari kasu eginez, aurten su bat gehiago piztu zen, bortz guztira. Suak saltatu ondotik urtero bezala hau ere,  xingar eta xixtor jatea egin zuten Anizen, eta akitzeko etxe bakoitzetik ekarritako postrea jateko aukera izan zuten. Ilundu ondotik eta udari ongi etorria egin ondotik, etxerat joan ziren. Argazkiak: Maitane Maritorena

Aski ongi joan da aurten ere Liburuaren Eguna Anizen. Bigarren edizio honetan, Lurdesek ipuinak kontatu zituen asteazken arratsaldean batzartegian eta ondotik, haurretik etxetik eraman zituzten liburuak trukatu zituzten. Maiatzaren 7 artio izanen dute utzitako liburuak itzultzeko hondar eguna.