Euskal Herriko Mendi Duatloi Zirkuituaren hamaseigarren edizioaren barrenean Aiako VI. Mendi Duatloia egin zuten urriaren 24an Andatzan. Kirolariek 6,21 kilometro luze eta 275 metroko desnibel positiboa zuen ibilbidea osatu behar zuten lasterka eta 13,2 kilometro luze eta 642 metroko desnibel positiboa zuen ibilbidea mendi bizikletarekin. Eneit Bertiz Apezetxea sunbildarra nagusitu zen.
Hasieratik bukaerara aitzinetik ibili zen Bertiz eta ordubete, 21 minutu eta 33 segundo behar izan zituen lasterketa osatzeko. Hiru minutu eta erdiko aldea atera zion bigarren izan zen Eneko Gurrutxagari (1.25.03) eta lau minutu baino gehiago hirugarren izan zen Aitor San Sebastiani (1.26.41).
Eskualdeko kirolari gehiago ere izan ziren Aiako proban. Saltoki Orbea taldeko Mikel Telletxea Sarratea gazteluarra zazpigarren izan zen (1.29.50) eta Xuban Etxegia Etxebeste sunbildarra hamalaugarren (1.41.24).
Emakumeen artean, Ainhoa Urteaga zumaiarra izan zen bizkorrena.