Haur eta gurasoek osatutako Irumaita txarangak giro ederra jarri du aurten ere

Txupinazoa abuztuaren 14an, asteazken eguerdian botako badute ere, Goizuetako Amabirjin festen lehen seinalea asteburu honetan izan dute. Igandean Umore Ona abesbatzako auroroak atera ziren kantari eta gero elkarrekin bazkaldu zuten. Umeen Eguna ere ospatu zen, Irumaita txarangaren animazioarekin. Denek, eguraldi euritsuari aurpegi ona jarri zioten goizean. Argazkiak: Felix Loiarte

Emakumeen arteko pala partidak jokatu zituzten frontoian 

Ainhoatik Usurbilerako bidean, Goizuetan harrera egin zioten abuztuaren 8an Euskal selekzioak martxan, garena garelako, ofizialtasuna! goiburupean egiten ari den euskal selekzioaren aldeko mendi martxari. Sunbillatik goizean goiz aterata arratsaldean ailegatu ziren Goizuetara ibiltariak eta kalejiran joan ziren frontoira. Bertan, emakumezkoen pala txapelketak jokatu zituzten eta gero, afaria izan zuten herriko festetarako dagoeneko prest dagoen ikastolako ostatuan. Bertsolariak ere aritu ziren. Goizuetatik aterata Andoainerako bidean eskualdea utziko du gaur mendi martxak. Abuztuaren 10ean eginen dute azken etapa, Andoain eta Usurbil artean. Argazkiak: Felix Loiarte