Oriamendik antolatuko duen azken Binakako Erremonte Txapelketa Nagusia azaroaren 28an abiatuko da

Ttipi-Ttapa

56. Binakako Erremonte Txapelketa Nagusia eta bigarren mailako txapelketa jokatuko duten pilotariak, ortzegunean egindako aurkezpenean. Argazkia: Maialen Andres

Binakako 56. Erremonte Txapelketa Nagusia azaroaren 28an hasiko da, lau bikoterekin. Oriamendik antolatuko duen azkena izanen da. Txapelketa nagusia jokatuko duten zortzi erremontistetatik hiru eskualdekoak dira: Aimar Jabalera doneztebarrak Barrenetxea IV.a izanen du bizkartzain, Josetxo Ezkurra II.a doneztebarra Aiestaran VI.arekin ariko da eta Aritz Zubiri goizuetarrak Aldabe izanen du lagun aurreko koadroetan. Goikoetxea V.ak eta Azpirozek osatuko dute laukotea.

Lau bikotek jokatuko dute larunbatean hasiko den 56garren edizioa eta bertze hiru bikote ariko dira bigarren mailakoan

Hiru jardunaldi jokatuko dira ligaxkan (azaroren 28an, abenduaren 5ean eta abenduaren 12an), jardunaldiko bi partidekin, finalaurreko bat abenduaren 19an eta finala abenduaren 26an. Ligaxkako lehenengo sailkatua zuzenean pasako da finalera eta bigarren eta hirugarren sailkatuek jokatuko dute finalaurrea. 

Bigarren mailakoan Martixpe doneztebarra

Bigarren mailakoa ere jokatuko da hiru bikoterekin eta lau jardunalditan. Martixpe doneztebarra izanen da eskualdeko erremontista bakarra. Finala abenduaren 19an jokatuko dute. Bikoteak dira: Deskarga-Ugarte, Martixpe-Goikoetxea VI.a eta Arluziaga-Eskudero.

 

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun