Euskal Herriko 4x4 sokatira txapelketa azaroaren 30ean abiatu zen, Antsoainen jokatutako txapelketa mistoarekin. Txantrea izan zen txapeldun, Beti Gazte bigarren eta Abadiño hirugarren. Astebeteko atsedenaren ondotik, igande goizean jokatuko dute emakumeen txapelketa, hau ere Antsoainen. 250 kiloz beheitiko kategorian aritu dira zortzi laukote, eta Lesakako Beti Gazte jaun eta jabe izan da, tiraldi guziak irabaziz. Beti Gazte txapeldunaren ondotik, Txantrea izan da bigarren eta Abadiño B hirugarren. Laugarren postua Abadiño Ak eskuratu du, borzgarrena Antsoain Bk, seigarrena Araxesek, zazpigarrena Antsoain Ak eta zortzigarrena Amaiurrek.

Lehen aldiz, Baztan-Bidasoa eskualde osoko enpresaburuek bat egin dute 'Don Miguel de Muzquiz' Enpresa Klubaren inguruan. Joan den ortziralean aurkeztu zuten kluba Bertizko Jaurerriko Jauregian eta 60 enpresa baino gehiagoren ordezkariak bildu ziren. Mikel Irujo Industria eta Trantsizio Ekologiko eta Enpresa Digitaleko kontseilaria eta Jose Mª Aierdi Landa Garapeneko eta Ingurumeneko kontseilaria izan ziren ekitaldiaren buru. Beraiekin batera, Javier Mariezcurrena Enpresa Klubeko lehendakaria, Joseba Martikorena lehendakariordea eta, klubeko gazteen mahaiko Maria Irigoien izan ziren mahaian. Iñaki Larraya Sodena sozietate publikoko zuzendari kudeatzailea ere ekitaldian izan zen, eskualdeko hainbat alkate eta udal ordezkarirekin batera.