Baztan-Bidasoko Turismo Elkarteak lurraldea dinamizatzeko Next Generation funtsetara aurkeztutako proiektuen artean, Bidasoko Bide Berdearen eta inguruko herrien arteko lotura zikloturistak daude. Berrizaun eta Etxalar lotzeko bidearen seinaletika berriki bukatu dute eta honela, Etxalarko bizilagunak eta bisitariek bide berdera joateko bide seguruago eta erosoagoa izanen dute. Proiektua, bertze hainbat ekintza bezala Cederna Garalurren bitartez exekutatu da.

Maiatzaren 9an, larunbat goizean, V. Etxalar BTT ibilaldia eginen dute. Ibilbidean aitzineko urteekin konparatuta, aldaketa batzuk egin eta bidexka eta zirkuitu berriak sortu dira, edozein txirrindularik egiteko modukoa izan dadin. Kolore gorriz (bide teknikoagoak) eta berdez (bide errazagoak) seinaleztatu dira eta norberak aukeratuko du nondik ibili. 100 parte hartzaile baino gehiagok eman dute izena eta 09:00etan hasiko da proba Etxalarko plazatik. Plaza inguruan giro ezin hobea ziurtatua izanen da; dutxa zerbitzua, sorpresak, sariak, zozketak, bizikletak garbitzeko aukera eta jakirik ez da faltako.