Erremontistek jakinarazi zutenez, «azken asteotan Eusko Jaurlaritzarekin bildu gara, eta bertan adierazi digute erremontea ekonomikoki laguntzen jarraitzeko prest daudela, egungo laguntzak mantenduz eta, beharrezkoa bada, indartuz». Era berean, «beren eskumenen barruan» aholkularitza emateko prest daudela azaldu diete. Hala ere, argi utzi dute egitura berri baten sorrera ekimen pribatu edo enpresa proiektu baten eskutik etorri behar dela.
Horregatik, aukera baten mezua zabaldu nahi izan dute Oriamendi 2010eko erremontistek: «Erremontea bertako kirola da, euskaldunona, geurea, nortasun propioa duena eta babes instituzionala duena. Une hau baliagarria izan daiteke etapa berri bat irekitzeko: egungo eredua berrikusteko, jarduera Galarretaz harago zabaltzeko, oinarri lana indartzeko eta erremonte profesionalaren bateratzea sustatzeko».
Plantillaren aldetik, jarraitzeko borondatea adierazi nahi izan dute, «inplikatzeko eta kirol honen etorkizunaren alde lan egiteko prest» daudela azpimarratuz. Hori posible izan dadin, «beharrezkoa da 2027tik aurrera kudeaketa profesionala bere gain hartuko duen egitura edo lidergo bat agertzea». Etapa berri hau gidatzeko interesa duen enpresari edo proiekturen bat baldin badago, pilotarien aldetik «konpromisoa, aholkularitza, profesionaltasuna eta elkarlanerako prestutasuna aurkituko dituela» adierazi dute agerraldian. «Gaur ez dugu inor seinalatzen. Gaur bat egitera gatoz. Gaur ate berri bat irekitzeko nahia eta gure babesa eskaintzera gatoz. Erremonteak historia du, nortasuna du, eta guk sinesten dugu etorkizuna ere baduela. Eskerrik asko gerturatu zareten guztioi. Gora erremontea» adierazi dute, agerraldia bukatzeko.