Lesakako Arkupe Pilotazaleen elkarteak, Lesakako Udalaren laguntzaz hirugarren urtez antolatutako eskuz binakako pilota txapelketa aitzinera doa eta igande honetan jokatuko dituzte kadete eta alebin mailako mutikoen final laurdenak Lesakan eta Sunbillan. Infantil mailan jokatzeko falta den partida ere Lesakan jokatuko dute. Nesken final laurdenak, berriz, Igantzin jokatuko dituzte. Ortzegunean senior mailako jardunaldia ere jokatu zuten Lesakan.

Urtarrilaren 28an, Lurraren Berotzearen Aurkako Ekintzaren Munduko Egunean, egin dute publiko Stop Fosilak ekimena. Stop Fosilak klima larrialdiaren testuinguruan erregai fosiletatik berriztagarrietara trantsizioa bultzatu nahi duen ingurumen elkartea da eta taldea aurkeztearekin bat, erreferentziazko zenbait pertsonek sinaturiko manifestua, Bizitzaren alde, Stop Fosilak izenburua duena ere argitara eman dute. «Trantsizio energetikoaren gaiari gure ekarpena egin nahi diogu» adierazi dute Stop Fosilak ekimeneko kideek, tartean Gorka Laurnaga elizondoarrak eta Lorea Flores lesakarrak.