Kolore guztietako metalak lortu ditu Ander Larraburu sunbildarrak Espainiako pistako txirrindularitza txapelketan

Ttipi-Ttapa 2026ko apirilaren 7a

Ander Larraburu Hernandorena sunbildarra, bigarren Espainiako junior mailako pistako txirrindularitza txapelketako keirin modalitatean.

Joan den urtean kadete mailan hainbat txapelketa eta proba irabazi ondotik, junior mailan ere lehiakor eta bikain hasi da aurten Ander Larraburu Hernandorena txirrindulari sunbildarra. Egunotan Madrileko Galapar hirian jokatutako Espainiako pistako txirrindularitza txapelketan urrezko, zilarrezko eta brontzezko dominak eskuratu ditu.

Junior mailako bere lehen urtean, kategoria horretako txapeldun izan da Nafarroarekin taldekako lehiaketan eta bakarka, zilarra eskuratu du keirin modalitatean eta brontzea kilometroko proban

Zehazki, urrea taldekako jazarpen txapelketan lortu du Larraburuk, Luca Martinez, Aitor Mata eta Javier Monrealekin batera osatutako Nafarroako selekzioarekin. Euskadi bigarren eta Katalunia hirugarren izan ziren podiumean.

Ander Larraburu, Nafarroako selekzioko bertze kideekin, jazarpen proba hasteko prest. Urrezko domina eskuratu zuten.

Keirin modalitatean, berriz, bigarren izan zen Ander Larraburu, zilarrezko domina eskuratuz. Valentziako Pepe Arques izan zen txapeldun eta Gaztela-Mantxako Alejandro Sanchez hirugarren.

Kilometroko proban, azkenik, hirugarren izan zen eta brontzezko domina eskuratu zuen Larraburuk (1.07.152). Hemen ere Valentziako Pepe Arques izan zen txapeldun (1.06.082) eta Euskadiko Eneko Ugartemendia bigarren (1.07.057).

Ander Larraburu hirugarren, kilometroko proban.

Txapelketa bikaina, beraz, kontuan hartuz Ander Hernandorenak lehenbiziko urtea duela kategoria honetan.

Kirola Malerreka Sunbilla

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.

Egin TTIPI-TTAPAren lagun