Promozio mailan, berriz, Alize Sagardui goizuetarra eta Etxeberria izanen dira Arrutiren eta Dunixe Alberro iturendarraren kontrarioak ortziralean Azpeitian
Promozio mailan, ligaxkan partida guztiak irabazi dituzten Arrutik eta Dunixe Alberro iturendarrak finalerako txartela segurtatua zuten. Hortaz, bigarren bikote finalista erabaki zen larunbatean Beasainen. Alize Sagardui goizuetarrak eta Etxeberriak 22-12 irabazi zieten Iraide Iriarte sunbildarrari eta Ernagari. Hasieratik partida serioa egin zuen bikote urdinak. Biharamunean Emakume Master Cupeko finala jokatzekoa zuen Alize Sagarduik beste abiadura bat eman zion pilotari eta gorriak defentsa lanera behartu zituen. Markagailuan agudo ireki zuten zuloa eta gorriak saiatu ziren arren, ezinezkoa egin zitzaien.
Lehen mailako lehen finalerdian, berriz, Iturriaga leitzarrak eta Orbegozok 22-8 irabazi zieten Mujika eta Ruiz de Larramendi izeba-ilobei. Markagailuak erakusten duena baino lehia gogorragoa izan zuen arren, liga fasean erakutsi duten sendotasuna plazaratuz final preziatura sailkatu zen Iturriaga-Orbegozo bikotea.
Oskoz eta Arrastia finalera Legazpin
Igandean Legazpin jokatu zen lehen mailako bigarren finalerdian, berriz, Barrokal eta Perez faborito eta irabazten hasi ziren arren, Oskozek eta Arrastiak buelta eman zioten neurketari eta finalerako txartela eskuratu zuten (17-22).
Finalak ortziralean Azpeitian
Gauzak honela, martxoaren 27an, ortziralean 21:00etan hasita jokatuko dituzte bi finalak Azpeitian. Promozio mailan, txapeldunetako bat eskualdekoa izanen da, Arruti eta Dunixe Alberro iturendarra, Alize Sagardui goizuetarraren eta Etxeberriaren kontra jokatuko baitute. Lehen mailako finalean, berriz, Iturriaga leitzarra eta Orbegozo, Oskozen eta Arrastiaren kontra ariko dira.