Inaute Astelehena eta Asteartea joan dira Aurtitzen, Iturenen eta Zubietan. Astelehena izan zuten inauteetako egun handia Iturenen eta asteartea Zubietan. Astelehenean Aurtizko eta Zubietako joaldunei egin zieten Iturengoek Iturenen. Asteartean, aurtiztar eta iturendarren bisita izan zuten zubietarrek. Batean nahiz bertzean hainbat joaldun eta mozorro plazaratu dira, herritarren eta bisitarien gozamenerako. Iturenen 81 joaldun atera ziren, Ismael Elizalde eta Juanito Mariezkurrena buru zutela (34 Iturengoak, 24 Zubietakoak eta 12 Aurtitzekoak eta 11 ttiki); Zubietan ere 81 joaldun atera ziren, Mikel Loiarte eta Pedro Arregi buru eta Iñaki Etxeberria hartzazain zituztela, 33 Zubietakoak (tartean zazpi ttiki), 30 Iturengoak eta 18 Aurtitzekoak. Argazkiak: Maria Larretxea, Juanito Ibarrola, Juan Mari Ondikol eta utzitakoak

Gainean ditugu inauteriak. Aurtitzen, Iturenen eta Zubietan abiatu dira dagoeneko eta ortzegun ilunabar partean puska biltzen ibiliak dira. Azken bi urteetan bezala, inauterietako astelehen eta asteartean autobus zerbitzua antolatu dute Iturengo eta Zubietako udalek.