Elite mailako XII. Soroa Memoriala irabazi dute Beñat Apezetxea goizuetarrak eta Unax Apeztegia elizondoarrak

Ttipi-Ttapa 2026ko otsailaren 18a

Beñat Apezetxea goizuetarra eta Unax Apeztegia elizondoarra (urdinez), txaledun suertatu ziren elite mailan, Irribarriari eta Bernaolari irabazita.

XII. Memorial Soroa pilota txapelketako finalak jokatu dituzte otsailaren 15ean Tolosan, inauterietako igandean. Elite mailan, ASPErekin kontratua sinatua izan arren, oraindik afizionatu mailan azken partidak jokatzen ari den Umore Onako Beñat Apezetxea goizuetarrak eta Oberenako Unax Apeztegia elizondoarrak 22-16 irabazi zieten Tolosako Irribarriari eta Lea Artibai Motrolloko Bernaolari.

Lehen mailan, Muruak eta Santesteban zubietarrak (gorriz), galdu egin zuten Sarasibarren eta Balerdiren kontra.

Lehen mailan txapeldun orde izan da Endika Santesteban zubietarra Tolosako pilota txapelketan

Lehen mailako finalean, aldiz, Intxurreko Muruak eta Irurtzungo klubean ari den Endika Santesteban zubietarrak 15-22 galdu zuten Oberenako Sarasibarren eta Balerdiren kontra. Senide eta lagun kuadrilla ederra joana zen Tolosara Santesteban babestera, baina ez zen aski izan txapela Zubietara eramateko.

Endika Santesteban animatzera eta babestera hainbat zubietar joan ziren igandean Tolosara.

Promesa mailan, Tolosako Perurenak eta Buruzgaingo Okiñenak 18-12 irabazi zieten Intxurreko Madinari eta Tolosako Castrori.

Kirola Baztan Leitzaldea Malerreka Elizondo Goizueta Zubieta

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.

Egin TTIPI-TTAPAren lagun