Zubietako Hirigintza Planaz aritzeko jende dezente elkartu zen apirilaren 24an Zubietako herriko etxean egindako bileran, 30 bat lagun. Saioan hainbat gai azaldu ziren, batez ere, oinarrizko kontuak: zer den hirigintza plana, zertarako balio duen, eta lizentziekin sortzen diren zenbait arazo argitzeko azalpenak eman ziren. Ernesto Dominguez alkatearen ustez, azpimarragarriena ardi borden erabileraren inguruko gaia izan zen: «Gaur egun gazte askok herritik alde egiten dute, herriko etxeak konpontzea garestiegia delako. Testuinguru horretan, ardi bordak aukera interesgarria izaten ahal da lehen etxebizitza bihurtzeko».

Baztan-Bidasoaldeko 21 udaletako alkateek lurraldearen garapen sozioekonomikoa modu koordinatuan eta jasangarrian bultzatzen segitzeko lankidetza hitzarmena sinatu zuten joan den ortzegunean, Donezteben, Aitor Larraza Karrerarekin batera (Cederna Garalurren ordezkari gisa).