Iruñeko eta Tuterako elizbarrutiak zortzi boluntario misiolari bidaliko ditu uda honetan munduko hainbat tokitara. Bidalketa maiatzaren 19an ospatu zen Artzapezpikutzan, Florencio Roselló artzapezpikuak gidatuta. Parte hartzaileek biziko duten zerbitzu eta elkartasun lana nabarmendu zen. Horietatik hiru Ekuadorko Amazoniara joanen dira, Txarli Azkona misiolari nafarrarekin egotera; tartean, Zubietako Lino Elizalde ere. 

Aurreko batean aipatu bezala, Zubietako Hirigintza Planaz aritzeko jende dezente elkartu zen apirilaren 24an Zubietako herriko etxean egindako bileran. Orduan mahaigainean jarritako gai nagusietako bat izan zen ardi bordak lehen etxebizitza bihurtzeko aukera. Azken urteetan, hainbat herritarrek ardi borden erabilera aldatzeko eskaerak aurkeztu dituzte, etxebizitza gisa erabiltzeko. Orain arte, aurkeztutako eskaerek kontrako ebazpena jaso dute.