Eskualdeko pilotariek txapel uzta polita ekarri dute Altsasuko txapelketatik ere

Ttipi-Ttapa 2026ko irailaren 16a

54. Santo Cristo de Otadia Pilota Txapelketako hiru kategoriatako txapeldun eta txapeldunordeak, igandean Altsasuko Burunda pilotalekuan.

Altsasuko Santo Cristo de Otadia Pilota Txapelketaren 54. edizioko finalak jokatu zituzten igandean Altsasuko Burunda pilotalekuan eta eskualdeko pilotariek txapel uzta polita ederra ekarri zuten: Leitzako klubeko Baleztena eta Sagastibeltza txapeldun izan ziren jubenil eta promesa mailako lau eta erdiaren barreneko txapelketan, hurrenez hurren. Eskuz binakako txapelketan, berriz, Irurtzun klubeko Santesteban zubietarra, txapeldun izan zen Mundarroko Etxeberriarekin batera, Nazabali (Larraun) eta Leitzako klubeko Goikoetxeari irabazita.

Endika Santesteban zubietarrak irabazi du eskuz binakako txapelketa eta Leitzako klubeko Baleztenak eta Sagastibeltzak jubenil eta promesa mailako lau eta erdiaren barreneko txapelak

Igande arratsaldeko jaialdia jubenil mailako lau eta erdiaren barreneko txapelketako finalarekin hasi zen. Leitzako klubeko Julen Baleztenak nagusitasunez, 22-6 irabazi zion Najerino klubeko Paraguayo VII.ari.

Ondotik, promesa mailako lau eta erdiaren barreneko finala jokatu zuten eta hemen ere, erraz irabazi zion Leitzako klubeko Janitz Sagastibeltzak Buruzgain klubeko Zabaletari (22-8).

Binakako txapelketaren finalean ere ez zen kolorerik izan eta Astigarragako Mundarroko Etxeberriak eta Irurtzun klubeko Endika Santesteban zubietarrak 22-5 irabazi zieten Nazabali (Larraun) eta Leitzako klubeko Eñaut Goikoetxeari.

Kirola Leitzaldea Malerreka Leitza Zubieta

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.

Egin TTIPI-TTAPAren lagun