Urteko azken Ekomerkatuak CPAEN/NNPEKeko hainbat ekoizle bilduko ditu abenduaren 6an, larunbatean 10:00etatik 14:00etara Iruñeko autobos geltoki zaharrean, eta beren produktuak salgai jarriko dituzte, Nafarroako produktu ekologiko ugari etxera eramateko aukera eskainiz: Erratzuko Pittika gazta, Lizarraldeko olioa eta lekaleak, Arbeizako eztia, Imotz Haraneko arrautzak, Munarrizko patatak eta lekaleak eta Iturgoieneko gaztak edo Caparrosoko sasoiko barazkiak, bertzeak bertze. Gainera, hilabete honetan Irunberriko Azpea Upaitegiaren ardoa eta Valentziatik Horta de Ximoren laranjak, mandarinak, limoiak eta kaki ekologikoak izango ditugu postu gonbidatuak bezala.

Futbolean Beti Gazteko eta Baztango neska kadeteek berdindu egin dute eta eskubaloian Errekako eta BKTko neska kadeteen derbian baztandarrak gailendu dira.

Azaroko hondarreko asteburuak Baztango eta Doneztebeko futbol eta eskubaloi talde nagusien arteko derbiak ekarri ditu eta bietan emozioa izan dute azken unera arte. Futbolean, lehen aldiz Nafarroako lehen maila autonomikoko derbia jokatu zuten ikuslez lepo eta giro bikaina izan zuen Giltxaurdin Baztanek eta oraindik partidarik galdu ez zuen Doneztebek. Partida hasi eta berehala aitzinetik paratu ziren doneztebarrak, baina bigarren zati hasieran berdindu egin zuen Baztanek. Partida berdinketarekin akituko zela zirudienean, azken jokaldian Imanol Zocok sartutako golak garaipena eman zien baztandarrei. Halere, Doneztebek igoera zuzeneko postuan segitzen du eta baztandarrak aunitz hurbildu dira goitiko postuetara. Eskubaloian ere berdintasun handia izan zen Errekako eta BKTko emakumeen artean larunbat arratsaldean Doneztebeko kiroldegian. Azkenean, gol bakarragatik irabazi zuen Errekak eta lider segitzen du. Futbolean bertze derbia bat ere jokatu zuten Beti Gazteko eta Baztango neska kadeteek Mastegin eta berdindu egin zuten. Eskubaloian ere, Errekako eta BKTko neska kadeteen arteko lehia izan zuten larunbat goizean Donezteben eta baztandarrak gailendu ziren. Errekako gizonezkoek ere etxean irabazi dute eta, errugbian, BRT Menditarrak taldeak garaipena lortu du.