Arkupeak elkarteko mendi taldeak hilabeteroko txangoa egin du maiatzaren 20an. Eguraldiarekin kezka baldin bazuten ere, astearteko eguraldi ederra aprobetxatu eta Hondarribiko Guadalupe ingurutik abiatu eta Jaizkibel mendian ibili ziren 75 mendizale, aunitzetan Kantauri itsasoaren bazterrean. Ibilbide polita egin zuten eta indarrak berreskuratzeko, Berako Zalain jatetxean beti bezain ederki bazkaldu zuten. Irudiak: Joxe Zubieta

5-0 irabazi zion Mastegiko azken partidan Deusto taldeari eta matematikoki segurtatu du maila mantenduko duela, partida baten faltan

Denboraldiko azken txanpan sartuak daude eskualdeko kirol talde gehienak. Batzuk denboraldiko helburua betetzeko partida garrantzitsua zuten asteburuan. Beti Gazte futbol taldeko gizonezkoek Mastegiko azken partidan garaipena behar zuten maila mantentzeko eta halaxe egin zuten, bortz gol eginez gainera. Jon Zabalak hiru gol egin zituen eta Asier Tabernak bi eta gol hauei esker, Gipuzkoako ohorezko mailako golegileen sailkapen buruan paratu dira hamazazpina golekin, Zarauzko Simon Arangunekin berdinduta. Beraz, behin maila mantenduko dutela segurtatuta, azken jardunaldirako erronka polita izanen dute lesakarrek pitxitxia lortzea. Gainerako futbol talde nagusiez ez zuten deus handirik jokoan eta galdu egin zuten Baztango talde nagusiak, Aurrerak, Gure Txokoak eta Beti Gazteko emakumeek. Erregionaleko Baztanek denboraldiko garaipen handiena lortu zuen. Errugbian, Sarako Izarra errugbi taldeko gizonezkoen Frantziako txapelketako abentura final hamaseirenetan bukatu da, 17-19 galdu baitzuten Lieuraneko talde azkarraren aurka.