Etorkizuna gara goiburupean, Nafarroa osoko 36 gaztek, tartean eskualdeko zenbait, aritu dira INTIAk emandako abeltzaintza (20) eta nekazaritza (16) ikastaroetan, Atarrabian eta Erriberrin, hurrenez hurren. Behin ikastaroa bukatuta, 2025eko dirulaguntza deialdira aurkeztu ahal izateko ziurtagiria ere hartu dute. Aurten, 44 gazte instalatu dira, INTIAren aholkularitzari esker.

Lehen aldiz, Baztan-Bidasoa eskualde osoko enpresaburuek bat egin dute 'Don Miguel de Muzquiz' Enpresa Klubaren inguruan. Joan den ortziralean aurkeztu zuten kluba Bertizko Jaurerriko Jauregian eta 60 enpresa baino gehiagoren ordezkariak bildu ziren. Mikel Irujo Industria eta Trantsizio Ekologiko eta Enpresa Digitaleko kontseilaria eta Jose Mª Aierdi Landa Garapeneko eta Ingurumeneko kontseilaria izan ziren ekitaldiaren buru. Beraiekin batera, Javier Mariezcurrena Enpresa Klubeko lehendakaria, Joseba Martikorena lehendakariordea eta, klubeko gazteen mahaiko Maria Irigoien izan ziren mahaian. Iñaki Larraya Sodena sozietate publikoko zuzendari kudeatzailea ere ekitaldian izan zen, eskualdeko hainbat alkate eta udal ordezkarirekin batera.