2025ean hasi eta 2026ko martxoaren 28an Gipuzkoan, Amasa-Villabonan bukatuko den Euskal Herriko 17. Mus txapelketa abiatu da. Herriz herri jokatuko da lehen fasea otsailaren 22ra arte, herrialdeko finalak martxoaren 7an jokatuko dira zazpi herrialdeetan (Nafarroakoa Iruñeko Arrano elkartean eta Lapurdikoa Urruña-Pausuko Xaia ostatuan). Mus Federazioak, herrialdetako kanporaketen antolaketan parte hartzera deitu ditu mus zaleak. Gogoratu behar da joan den urtean 2.515 bikotek hartu zutela parte eta, denen artean, Jose Manuel Zabaleta eta Jose Miguel Gonzalez leitzarrak suertatu zirela txapeldun.

2025-2026 denboraldia mugarri garrantzitsua izanen da Aurrera Kirol Elkartearen historian. Izan ere, hainbat urtez Arkiskileko lohian eta putzuetan igeri ibili ondotik, azkenean, azaroaren 1ean, estreinatu zuten belar artifizialeko zelai berritua. Ekitaldi ederra izan zen. Osasunako eta Aurrerako beteranoen arteko futbol partidan 3-1 irabazi zuten hiriburukoek eta denboraldi honetarako talde guztien aurkezpena egin zuten.