Ipar Euskal Herrian sei urtetik behin egiten dituzte herriko kontseiluko ordezkariak hautatzeko bozak. Igande honetan, martxoaren 15ean, iraganen da lehen itzulia, eta 22an bigarrena, baina Saran, konparazione, ez dute bigarren itzuliaren beharrik izanen, bi zerrenda aurkeztu direlako. Senperen, ordea, hiru auzapezgai direnez, igandeko emaitzen arabera, bigarren itzulia izanen da edo ez.

Senpereko Ibarrun auzoko Inharria baserrian iraganen da martxoaren 14an, larunbat eguerditan, Zaldubi Ikastolak antolatzen duen Hiruka'ntuz bazkari kantatua. Iparraldeko hiru herrialdeak biltzen dira Kanta, kantu, kantore lemapean, aurten ere Integrazio Batzordearen alde. Liburuxka Inharrian eskura daiteke.