Aro hezea izan da protagonista Senpereko Jondoni Petri bestetan ere. Halere ekitaldi gehientsuenak bete dira erritmo lasai batean. Aitortu behar da, hauteskundeak zirela eta, jende anitz hurbildu baldin bada ere, ez zutela denek besta egiteko gutiziarik.

Frantziako Asanblearako bozen lehen itzulia iragan zen atzo Ipar Euskal Herrian. Ipar Euskal Herriko hiru barrutietan ezkerreko aliantza den Fronte Popular Berria izan da garaile. Udalerriz udalerri, halaxe izan da Saran ere. Senperen, berriz, ezkerreko aliantzari bortz bozeko aldea aterata, eskuin muturreko Batasun Nazionalak irabazi du. Igandean izanen dute bigarren itzulia.