Euskal Jai Erremonte Fundazioak eta E•remonte enpresak antolatutako Iruñeko Alde Zaharreko XII. erremonte profesionaleko txapelketa - Construcciones Mariezkurrena Sari Nagusiaren finalerdiak aurkeztu zituzten asteartean Iruñeko Labrit pilotalekuan. Hain zuzen, hiriburuko frontoian jokatuko dituzte finalerdiak apirilaren 3an, ortziralean 18:30ean hasiko den jaialdian. Lehen mailan, Matxin III.ak eta Ionek, min hartutako Zeberio II.aren ordez ariko den Mikel Mikelarena oiztarraren eta Otanoren kontra jokatuko dute eta promozio mailan, berriz, Oses eta Agirrezabala, Jon Sagaseta iruritarraren eta Baztanen kontra.

Nafarroako Turismoak MRR funtsek Baztan-Bidasoko eraldaketa turistikoan duten eragina jakinarazteko eta ikusarazteko jardunaldia antolatu zuen asteartean. Hau izan da Nafarroako bertze zonalde batzuk zeharkatuko dituen biraren lehen geldialdia, helburu berarekin: zonalde bakoitzean egindako proiektu eta jarduera interesgarriak ezagutzea, aldi berean lurraldeko eragile publiko-pribatuekin topaketa profesional bat sortuz. Nafarroa osoan, funts horietatik eratorritako 85 milioi eurori esker, turismoa eraldatzeko 300 proiektu baino gehiago sortu dira ehun toki erakundetan baino gehiagotan.