Iruñeko Labrit pilotalekuan egiten ari diren obren ondorioz, final laurdenetako lehen fase osoa Doneztebeko Ezkurra pilotalekuan jokatuko dute, asteburu honetan hasi eta martxo hondarrera arte. Ohikoa denez, txapelketa ADANO elkartearen alde antolatu dute. Ligaxka osorako abonamendua 15 eurokoa da eta eguneko sarrera 5 eurokoa izanen da.
Launa bikote lehen eta promozio mailan
Lehen mailako txapelketan lau bikote izanen dira, tartean, Xanti Uterga eta David Mitxeo doneztebarrek osatutakoa. Mikel Mikelarena oiztarra Otanorekin ariko da eta Zeberio II.a-Barricart eta Matxin III.a-Ion bikoteek osatuko dute lehen mailako koadroa.
Bigarren mailan berriz, Jon Sagaseta iruritarra eta Baztan, Xuban Iturregi iruritarra eta Xuban Ilarregi oiztarra, Koteto Ezkurra III.a doneztebarra eta Markel Leatxe donamariarra eta Oses-Arrizabalaga ariko dira.
Aipatu bezala, final laurdenetako ligaxka osoa Doneztebeko Ezkurra pilotalekuan jokatuko da. Lehen jardunaldia otsailaren 21ean, larunbat honetan, 18:00etan hasiko da. Promozio mailako txapelketako partidan, Sagaseta eta Baztan, Ezkurra III.aren eta Leatxeren kontra ariko dira eta lehen mailakoan, Uterga eta Mitxeo, Mikelarenaren eta Otanoren kontra. Beraz, bi partiden artean, Malerrekako bortz erremontista eta baztandar bat ikusteko aukera izanen da.
Ondoko bortz larunbatetan (otsailaren 28an eta martxoaren 7, 14, 21 eta 28an) jokatuko dituzte finak laurdenetako ligaxkako bertze partidak.
Finalerdiak apirilaren 3an eta finala apirilaren 10ean Labriten
Ligaxkako lehen sailkatuek, bai lehen mailan, baita promoziokoan ere, apirilaren 10ean Labriten jokatuko diren finaletarako zuzeneko txartela lortuko dute. Bigarren eta hirugarren sailkatuek, berriz, finalerdietako partida jokatuko dute apirilaren 3an Iruñeko Labriten.