Doneztebarrak nagusi Iruñeko Alde Zaharreko erremonte txapelketako final laurdenetako lehen jardunaldian

Ttipi-Ttapa 2026ko otsailaren 23a
Deskargatu Info Ahotsak :
Español English Français Català Galego

Mitxeo, Uterga, Otano, Mikelarena, Sagaseta, Baztan, Leatxe eta Ezkurra III.a, Josu Prim epailearekin eta Erremonte Fundazioko Jaime Agirrerekin, larunbatean Donezteben.

Iruñeko Alde Zaharreko erremonte profesionaleko txapelketa - Construcciones Mariezkurrena Sari Nagusiaren final laurdenetako lehen jardunaldia jokatu zuten larunbatean Doneztebeko Ezkurra pilotalekuan. Lehen mailako partidan, Xanti Uterga eta David Mitxeo doneztebarrek nagitasunez irabazi zieten Mikel Mikelarena oiztarrari eta Otanori (35-26). Promozio mailako partida berdinduagoa izan zen, baina azkenean, Koteto Ezkurra III.a doneztebarrak eta Markel Leatxe donamariarrak 35-32 irabazi zieten Jon Sagaseta iruritarrari eta Baztani.

Utergak eta Mitxeok irabazi zuten lehen mailako lehian eta Ezkurra III.ak, Leatxe donamariarrarekin, promoziokoan

Nafarroako Gobernuak sustatutako Kirolean LGTBIfobiaren aurkako nazioarteko egunarekin bat egin zuen Erremonte Fundazioak eta ortzadarraren koloreekin besokoak jantzi zituzten erremontistek.

Bigarren jardunaldia otsailaren 28an

Labrit pilotalekuko obrak direla eta, final laurdenetako ligaxka osoa Doneztebeko Ezkurra pilotalekuan jokatuko da. Bigarren jardunaldia otsailaren 28an, larunbatean 18:00etan hasita jokatuko dute. Promozio mailan, Oses eta Agirrezabala, Ezkurra III.aren eta Leatxeren kontra ariko dira eta lehen mailan, Zeberio II.a eta Barricart, Matxin III.aren eta Ionen kontra.

Ondotik, martxoko lau larunbatetan jokatuko dituzte bertze lau jardunaldiak.

Finalerdiak apirilaren 3an eta finala apirilaren 10ean Labriten

Ligaxkako lehen sailkatuek, bai lehen mailan, baita promoziokoan ere, apirilaren 10ean Labriten jokatuko diren finaletarako zuzeneko txartela lortuko dute. Bigarren eta hirugarren sailkatuek, berriz, finalerdietako partida jokatuko dute apirilaren 3an Iruñeko Labriten.

Kirola Baztan Malerreka Irurita Donamaria Doneztebe Oiz

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun