Eguberrietako Haur Txokoa antolatu du aurten ere Bortzirietako Berdintasun Zerbitzuak. 3-12 urteko haurrei zuzendua da eta izena emateko epea azaroaren 25etik abenduaren 6ra arte dago zabalik. Apuntatzeko hondarreko egunak dira, beraz. Bortzirietan erroldatutakoek 30 euro ordaindu beharko dute eta erroldatuta ez daudenek 35 euro. 

Nafarroako Parlamentuko Hezkuntza batzordearen saioan parte hartu zuten atzo Baztan, Bera, Doneztebe eta Lesakako alkateek eta Elizondo Lanbide Eskolako eta Berako Toki Ona Institutuko zuzendariek. Hezkuntza Departamentuak Oronozko Lanbide Heziketa zentro berriko lanak 2026an hasiko direla hitz eman du eta egutegia zuzen betetzeko jarraipen batzorde bat sortzea eskatu zuten. Aldi berean, zentro berriko eskaintza ez murriztea ere eskatu dute. Baztan-Bidasoko udal eta ikastetxeetako ordezkariak parlamentu barrenean ziren bitartean, atarian elkarretaratzea ere egin zuten sindikatuetako ordezkariek.