Nafarroako euskararen erabilera soziala indartzeko helburuarekin, lankidetza hitzarmena sinatu dute Nafarroako Gobernuko lehendakariorde eta Memoria eta Bizikidetzako, Kanpo Ekintzako eta Euskarako kontseilari Ana Ollok eta Taupa euskaltzaleen mugimenduko Nafarroako koordinatzaile Oskar Zapatak. Hitzarmena Euskarak 365 egun programa garatzeko eta hurrengo Euskaraldia diseinatzeko aukera emanen du, bertzeak bertze.

Cederna Garalur elkarteak joan den astean aurkeztu zuen GoiNafarroa / AltaNavarra marka turistiko berria, lurraldea helmuga jasangarri, kohesionatu eta lehiakor gisa sendotzea helburu duen ekimen estrategikoa, bai estatu mailan baita nazioartean ere. Ekitaldia Larraintzarko Gizarte Etxean egin zen apirilaren 17an, eta bertan izan ziren Nafarroako Gobernuko Turismo zuzendari nagusia, Ana Rivas Allo, baita Cederna Garalur elkarteko presidentea, Arantxa Arregi Alberro, eta zuzendari gerentea, Ibon Mimentza de Irala ere. Ongietorri instituzionala Nahikari Uriarte Intxaurrondok egin zuen, elkarteko Helmuga Turistiko Jasangarrirako Planen (HJTP) koordinatzaileak.