Baztan-Bidasoa Turismo Elkarteak 2025eko bisita gidatuen eskuorria eta QRa prest ditu, eskualdean egin daitezkeen bisita gidatuen zerrenda bisitariaren eskura jartzeko. Edizio berri honetan 18 esperientzia eskaintzen dituzte, Baztan-Bidasoa zentzumen guztiekin gozatzeko! Bisita gastronomikoak daude: taloa eta gasna nola egiten diren ikusteko; bisita kulturalak: herrien historia eta istorioak ezagutzeko; eta abenturaz eta kirolaz gozatzeko bisitak: escape room ezberdinak, espeleologia egiteko aukera, bizikletaz egiteko ibilbideak, tirolinak…

Baztan, Bidasoa, Mendialdea eta Xaretako Aisialdia eta Gastronomia Gida argitara eman berri du TTIPI-TTAPAk. Gida horretan, inguru honetako 130 bat jatetxe, ostatu, komertzio eta aisialdirako enpresen eskaintzaren berri ematen da 88 orrialdetan bakoitzak eskaintzen dituen berezitasunak eta zerbitzuak azalduz hiru hizkuntzatan, euskaraz, gaztelaniaz eta frantsesez. Baztan-Bidasoa-Xareta-Mendialdeko mapa bat ere badu.