Etxalarko ibilbideak markatzeko eta Nafarroako Mendi Federazioaren eskutik, doako ikastaroa eskainiko dute otsailaren 28an, larunbatean, 09:00etan Pello Apezetxea Kultur Etxean. Martxoaren 14an, ibilbideen markatzea eginen dute, larunbatean 08:00etan hasita, eta horretarako ikastaroa egina izatea derrigorrezkoa izanen da. Ikastaroa egiteko Kultur Etxean izena eman behar da otsailaren 27a baino lehen. (948 63 53 86 / kulturetxea@etxalar.eus / 621 25 33 64).

Eguraldiak gehiegi lagundu ez badu ere, etxalartarrek ongi asmatu dute inauteriak giro onean ospatzen. Ortzegun gizenarekin hasi eta astearte inaute eguna arte, hainbat otordu, ekitaldi eta mozorro izan dira herrian. Astelehenean, gazteak La Basque jatetxean elkartu eta gosaldu zuten, ondotik, musikariek lagunduta, baserrietako eskea egiteko. Astearte inaute egunean, eguraldia pixka bat altxatu dela aprobetxatuz, karroza ikusgarriak plazaratu dituzte. Larraburu elkartean ere egin zuten inauteetako bazkaria asteartean. 36 lagun bildu ziren giro ederrean, denak goxo-goxo mahaiaren inguruan. Argazkiak: Irune Elizagoien, Andoni Iribarren eta Ana Indaburu