Urtarrilaren 28an, Lurraren Berotzearen Aurkako Ekintzaren Munduko Egunean, egin dute publiko Stop Fosilak ekimena. Stop Fosilak klima larrialdiaren testuinguruan erregai fosiletatik berriztagarrietara trantsizioa bultzatu nahi duen ingurumen elkartea da eta taldea aurkeztearekin bat, erreferentziazko zenbait pertsonek sinaturiko manifestua, Bizitzaren alde, Stop Fosilak izenburua duena ere argitara eman dute. «Trantsizio energetikoaren gaiari gure ekarpena egin nahi diogu» adierazi dute Stop Fosilak ekimeneko kideek, tartean Gorka Laurnaga elizondoarrak eta Lorea Flores lesakarrak.

Baztango Gazte Asanbladak eta Irakurleekin Solasean ekimenak bat eginen dute bertze behin, III. Irakurle Asanblada egiteko. Baztango Udalaren laguntzarekin, Erratzuko Lixutegian bilduko dira otsailaren 4an 18:00etan Oihane Zuberoa Garmendia idazlarekin, eta Apurkinak liburua izanen dute solasgai.