Arraioz Sagardia eta Doneztebe The Moment izanen dira aurrez aurre, 17:00etan hasita, abuztuaren 2ko Oiz Aren kontra finala jokatzeko txartelaren bila

Joan den igandean lortu zuen Oiz A taldeak abuztuaren 2an Doneztebeko Bear-Zanan jokatuko den Baztan-Errekako 45. laxoa txapelketako finalerako txartela, Oiz Bren kontrako lehia estuaren ondotik. Bertze finalista zein den uztailaren 26an, larunbatean 17:00etan Arraiozko plazan hasiko den partidaren ondotik erabakiko da. Arraioz Sagardia eta Doneztebe The Moment izanen dira aurrez aurre. Baztandarrek 7-9 irabazi zuten joanekoan eta itzulerakoa etxean jokatzen dutela baliatu nahiko dute. Baina aitzinean, azken hiru urteetako txapelduna izanen dute.

Ansa II.a eta Azpiroz, Aldabe eta Aritz Juanenea saldiastarraren kontra ariko dira larunbatean Galarretan

Oriamendik antolatutako Jai Alai Summer Season erremonte txapelketako finala jokatuko dute uztailaren 26an, larunbatean 16:30ean Hernaniko Galarretan hasiko den jaialdiko bigarren partidan. Finalerako pilotak bereizi zituzten eta Azpirozek eta Ansa II.ak pilota biziagoak aukeratu zituzten bitartean, Aldabek eta Aritz Juanenea saldiastarrak piloteoaren aldeko apustua egin dutela erran daiteke.