Vox alderdiaren eskariz, EAEko udal legearen dekretutik baliogabetutako artikulu gehienak gibelera bota ditu Espainiako Auzitegi Gorenak ere. Gorenaren epaiaren arabera, herrialde batean hizkuntza koofizialak daudenean batek ezin du «lehentasunik» izan bertzearen gainean eta hizkuntzen arteko «desorekak» eragotzi egin behar dira. Hala, euskara lehenetsiz gero, hizkuntzen koofizialtasuna urratzen dela ebatzi du. Epaia «larria» dela salatu du Udalerri Euskaldunen Mankomunitateak eta batez ere udalerri euskaldunei eta euskaraz aritzen diren udalei eragiten diela.
Euskararentzat justizia, lege-babesa eta arnasa eskatuz elkarretaratzeko deia egin dute larunbaterako. Euskararekin bat lelopean UEMAko kide diren hainbat udalerritako Herriko Etxeen atarian bilduko dira 12:00etan. Eskualdean hamahiru udal dira UEMAko kide eta Aranon, Arantzan, Donezteben eta Leitzan, behintzat, egitekoak dituzten elkarretaratzeak. Horietaz gain, Baztango eta Aresoko Udalak ere bat egin dute UEMAk egindako adierazpenekin.
Erantzuteko, izena emanda egon behar duzu eta horretarako baimenak eduki behar dituzu. Sartu komunitatera!