2025ean hasi eta 2026ko martxoaren 28an Gipuzkoan, Amasa-Villabonan bukatuko den Euskal Herriko 17. Mus txapelketa abiatu da. Herriz herri jokatuko da lehen fasea otsailaren 22ra arte, herrialdeko finalak martxoaren 7an jokatuko dira zazpi herrialdeetan (Nafarroakoa Iruñeko Arrano elkartean eta Lapurdikoa Urruña-Pausuko Xaia ostatuan). Mus Federazioak, herrialdetako kanporaketen antolaketan parte hartzera deitu ditu mus zaleak. Gogoratu behar da joan den urtean 2.515 bikotek hartu zutela parte eta, denen artean, Jose Manuel Zabaleta eta Jose Miguel Gonzalez leitzarrak suertatu zirela txapeldun.

Lidergoan segitzeko partidak izanen dituzte Sarako Izarrako errugbi taldeak, Errekako bi eskubaloi talde nagusiek eta Doneztebe futbol taldeek eta garaipena lortzen badu, igoera faserako sailkatuko da Gure Txokoa futbol taldea.

Eguberrietako atsedenaldiaren ondotik, urte berriko lehen jardunaldia izanen da eskualdeko kirol talde gehienentzat. Futbolean, etorkizun hurbilerako partidarik garrantzitsuena Gure Txokoak izanen du. Lehen faseko azken partida jokatuko du Irunen eta garaipena lortzen badu, bigarren postua segurtatu eta Gorengoen mailarako igoera fasea jokatuko du. Doneztebe futbol taldeak ere partida garrantzitsua izanen du, berekin batera lehen postuan puntutan berdindua dagoen Gazte Berriak Ansoain bisitatuko baitu. Irabazlerik bada, hori izanen da Nafarroako maila autonomikoko lider bakarra eta partida berdinduko balute, puntutan berdinduak segituko dute lehen postuan. Baztanek Lerinera bisita eginen du, promozioa jokatzeko aukera emanen liokeen laugarren postua mantentzeko asmoarekin. Beti Gaztek eta Aurrerak etxean jokatuko dute urteko lehen partida eta erregionaleko Baztanek Iruñean. Errugbian, Sarako Izarrak lidergoa mantentzeko partida garrantzitsua izanen du urtea hasteko, bigarren sailkatua baitator bisitan Animainerat. Puntu bakarreko aldea dago bi taldeen artean. BRT Menditarrak taldeak Durangon jokatuko du 2026ko lehen partida. Eskubaloian, Baztango BKTk etxean jokatuko du eta Errekako bi talde nagusiek lidergoa mantentzeko partidak etxetik kanpo jokatuko dituzte. Aurrerako eta BKTko neska infantilek derbia jokatuko dute Leitzan, baita Errekako eta BKTko alebinek ere.