2025ean hasi eta 2026ko martxoaren 28an Gipuzkoan, Amasa-Villabonan bukatuko den Euskal Herriko 17. Mus txapelketa abiatu da. Herriz herri jokatuko da lehen fasea otsailaren 22ra arte, herrialdeko finalak martxoaren 7an jokatuko dira zazpi herrialdeetan (Nafarroakoa Iruñeko Arrano elkartean eta Lapurdikoa Urruña-Pausuko Xaia ostatuan). Mus Federazioak, herrialdetako kanporaketen antolaketan parte hartzera deitu ditu mus zaleak. Gogoratu behar da joan den urtean 2.515 bikotek hartu zutela parte eta, denen artean, Jose Manuel Zabaleta eta Jose Miguel Gonzalez leitzarrak suertatu zirela txapeldun.

2026-2028 hirurteko planean sartzeko 15 milioiko inbertsioak aurreikusi ditu Nafarroako Gobernuaren Lurralde Kohesiorako Departamentuak, Toki Administrazioaren eta Despopulazioaren Zuzendaritza Nagusiaren bitartez. Horietatik hiru Malerrekan eta Bertizaranan egitekoak dituzte: Beintza-Labaienen, Iturenen, Donamarian, Narbarten eta Zubietan.