Maiatzaren 13an, asteazken eguerdian piztutako txupinazoarekin eta Baztango Gaiteroekin eta erraldoiekin herrian emandako bueltarekin abiatu ziren Iruritako bestak. Lehen suziria pizteko arduraduna sortzez lesakarra, baina aspaldian Iruritan bizi den Iban Etxarte Antzizar izan da, zikiroa prestatzeaz arduratzen den lan taldearen izenean. Talde horretan, Kotte Plaza, Aitor Sarratea, Miguel Garate, Maribel San Jose, Pello Mari Garate, Iosu Etxeberria, Mikel Prim, Idoia Argain eta Carlos Mindegia daude. Arratsaldean kirolak izan zituzten, pilota, herri kirolak eta aizkora apustua, baita musika, ezkila jotzea eta baztan zopak karpan. Argazkiak: Juan Mari Ondikol

Laxoa Elkarteak antolatutako Baztan-Errekako Laxoa Txapelketaren berrogeita seigarren edizioa abiatu da asteburu honetan. Finala abuztuaren 1ean jokatuko da Oizen eta herri horretako bi taldeak gogotsu hasi dira etxeko finalaren bila. Lehen jardunaldiko partidak Oizen jokatzea egokitu zaie eta bietan garaile suertatu dira: Oiz A taldeak 9-4 irabazi zion Doneztebe Apeztegiari eta Oiz B taldeak 9-5 Irurita Migeleneri. Halere, txapelketako lehen liderra Doneztebe Titi taldea da, 9-3 irabazi baitzion Bear Zana plazan jokatutako partidan Arraioz Zubiondoa-Indakoa taldeari. Bertze aldetik, asteburu honetan jokatzekoa zen jardunaldia gibeleratu egin dute.