Cederna Garalur Elkarteak hirugarren laguntza deialdia abiatu du Nafarroako Mendialdeko udalerrietan landa garapenerako proiektuak bultzatzeko. Deialdi honetako aurrekontua 1,6 milioi eurotik goitikoa da, lurraldeko ekonomia jarduera sendotzeko, ekintzailetza sustatzeko eta tokiko zerbitzuak eta ekipamenduak hobetzeko.

Euskal Jai Erremonte Fundazioak antolatutako Nafarroako Foru Komunitateko Erremonte Profesionaleko XXI. Txapelketak baditu urriaren 3an Zubirin jokatuko den finalerako bikoteak. Xanti Uterga doneztebarrak eta Agirrezabalak, joanekoan bezala, nagusitasunez irabazi zieten larunbatean Zangozan Jon Sagaseta iruritarrari eta David Mitxeo doneztebarrari (35-21). Honela, Utergak eta Agirrezabalak, Eloi Otxandorena doneztebarraren eta Otanoren kontra jokatuko dute finala urriaren 3an Zubirin. Joan den urteko finala errepikatuko dute, beraz. Orduan Otxandorena eta Otano nagusitu ziren.