Martxoaren 17rako greba orokorra deitua dute ELA, LAB, STEILAS, Hiru eta Etxalde sindikatuek.

Lehen faseko partida guziak irabazita, lider moduan ekinen dio Errekako gizonezkoen eskubaloi taldeak txapeldunen faseari. Lau lehenbizikoen artean sailkatzea du lehen helburua eta, oraingo bideari eutsita, sailkapenean lehena izan eta, ondorioz, lauko finala Donezteben jokatzea nahi lukete doneztebarrek. Gaur, ortzirale arratsean, eman dezakete bide horretan lehen urratsa Iruñeko Anaitasunan. Futbolean, infantil mailako derbia jokatuko dute Doneztebek eta Baztanek. Futbol talde nagusiei dagokienez, Nafarroako ligan ari direnek (Baztango biek, Doneztebek eta Aurrerak) etxean jokatuko dute eta Gipuzkoan ari direnek (Beti Gazte eta Gure Txokoa), kanpoan. Errugbian ere, kanpoan jokatuko dute Sarako Izarrak eta BRT Menditarrak taldeek, Landetan eta Logroñon.