Apirilaren 10eko finaletan Uterga-Mitxeo eta Ezkurra III.a-Leatxe izanen dituzte arerio
Lehen mailako finalerdian, hasiera berdindua izan zuten partidak. Lehen hiru tantoak Mikelarenak eta Barricartek egin zituzten, baina hirunako berdinketaren ondotik, launa, bosna eta seina berdindu zuten. 7-1eko partziala egin zuten Matxin III.ak eta Ionek (13-7) eta bazirudien partida hautsiko zela, baina berriz ere hamahiruna berdindu zuten Mikelarenak eta Barricartek. Hamalaunako berdinketaren ondotik, ordea, orduan bai, 11-2ko partziala egin zuten gorriek, bederatzi tantoko aldea hartzeko (25-16). Hortik aitzinera, aldeari ongi eutsi zioten eta, azkenean, 35-27 irabazi zuten Matxin III.ak eta Ionek, finalerako txartela eskuratzeko.
Promozio mailako finalerdian, bi atzelariak ongi ibili ziren, baina aitzineko koadroetan Sagaseta iruritarra Oses baino gehiago izan zen. Hirunako berdinketaren ondotik, urdinak beti aitzinetik ibili ziren markagailuan, baita bederatzi tantoko aldearekin ere (10-19 eta 12-21). Aldea bi tantora ekarri zuten gorriak (24-26 eta 25-27), baina azkenean gehiago izan ziren Sagaseta eta Baztan (30-35).
Gauzak honela, apirilaren 10eko finaletan, lehen mailan Xanti Uterga eta David Mitxeo doneztebarrak, Matxin III.aren eta Ionen kontra ariko dira eta promozio mailan, Koteto Ezkurra III.a doneztebarra eta Markel Leatxe donamariarra, Jon Sagaseta iruritarraren eta Baztanen kontra.