Lehen mailan Xanti Uterga eta David Mitxeo doneztebarrak, Matxin III.aren eta Ionen kontra ariko dira eta promozio mailan, Koteto Ezkurra III.a doneztebarra eta Markel Leatxe donamariarra, Jon Sagaseta iruritarraren eta Baztanen kontra
Final nagusian iazko txapeldunek, Matxin III.a eta Ion azpeitiarrek, txapelketa honetan partidarik galdu ez duten Uterga eta Mitxeo doneztebarren kontra jokatuko dute. Utergak iaz finala galdu zuen Barricartekin eta aurten, herriko atzelariarekin, errebantxa hartu nahiko du. Berdintasun handiko finala espero da.
Promozio mailako finalean, berriz, Koteto Ezkurra III.ak, 17 urterekin, profesionaletako bere lehen finala jokatuko du, joan den urteko sanferminetan debutatu ondotik. Aitzineko koadroetan, arerio, Jon Sagaseta iruritarra izanen du, pilotari abiadura eta indar handia ematen dion aurrelaria. Gibelean, Markel Leatxe donamariarrak bere sake hobea eta potentzia nabarmendu nahiko ditu Baztanen kolokazioari aurre egiteko. Final honetan ere ez da faborito argirik.
Txapelketa osoan bezala, finaleko jaialdia ere ADANO elkartearen aldekoa izanen da eta sarreran, dohaintzan, hamar euro ordainduko dute 22 urtez goitikoek, bortz euro 16-22 urte artekoek eta ttikiagoek sarrera doan izanen dute.