Bigarren sailkatuari bisita eginen dio eta garaipenak zortzi puntuko aldea emanen lioke

Liga bikaina egiten ari da Doneztebe futbol talde nagusia. Nafarroako Preferente mailako bere multzoan lider sendoa da eta hogei partidaren ondotik, alerik ere ez du galdu (15 irabazi eta 5 berdindu). Igande arratsaldean bigarren sailkatua bisitatuko du, Gazte Berriak Ansoain taldea. Bortz puntu guttiagorekin daude antsoaindarrak, baina hauek ere partida bakarra galdu dute eta Donezteben berdintzea lortu zuten lehen itzulian. Partida garrantzitsua izanen da, beraz. Gainerakoan, Beti Gazteko bi taldeek etxean jokatuko dute, baita Aurrerak ere. Eskubaloia, txapeldunen faseko lehen partida jokatuko dute Errekako emakumeek eta bigarrena gizasemeek. Errugbian, atseden izanen dute Sarako Izarrako bi taldeek eta Elorrion jokatuko du BRT Menditarrak taldeak.

Leitza, Areso, Goizueta eta Aranoko Familien Txokoa martxan da, berriz ere. Beste familia eta profesionalekin, hainbat gairi buruz hitz egin, zalantzak argitu eta esperientziak partekatzeko gune segurua da eta hainbat hitzordu antolatu dituzte datozen asteetarako.