Ekainaren 20tik 26rako astean 3.381 positibo erregistratu dituzte Nafarroan PCR edo antigeno testa egin ondotik (512 kasu 100.000 biztanleko), aurreko astean baino %41 gehiago. Nafarroako Osasun Publikoaren eta Lan Osasunaren Institutuaren (ISPLN) azken txosten epidemiologikoan ageri denez, eragina gero eta handiagoa da 65 urtetik gorakoetan. Hori dela eta, Osasunbideak bi gomendio egin ditu: osasun aldetik zaurgarriak diren pertsonei prebentzio neurriak zaintzeko gomendatu die, eta 18 urtetik gorakoei, aldiz, txertoaren hirugarren dosia hartzeko.