COVID-19: Azken datuak

Joan den astean Nafarroan COVID positiboak %41 igo ziren eta ospitaleratzeak %51,6

Joan den astean Nafarroan sei pertsona hil ziren COVID-19aren ondorioz.

Ekainaren 20tik 26rako astean 3.381 positibo erregistratu dituzte Nafarroan PCR edo antigeno testa egin ondotik (512 kasu 100.000 biztanleko), aurreko astean baino %41 gehiago. Nafarroako Osasun Publikoaren eta Lan Osasunaren Institutuaren (ISPLN) azken txosten epidemiologikoan ageri denez, eragina gero eta handiagoa da 65 urtetik gorakoetan. Hori dela eta, Osasunbideak bi gomendio egin ditu: osasun aldetik zaurgarriak diren pertsonei prebentzio neurriak zaintzeko gomendatu die, eta 18 urtetik gorakoei, aldiz, txertoaren hirugarren dosia hartzeko. 

Osasunbideak azpimarratu du 65 urtetik gorakoek, gaixotasun kronikoak dituztenek eta inguruko pertsonek prebentzio-neurriak erabil ditzatela, txertatuta egon arren. Era berean, 18 urtetik gorakoei txertaketa-prozesua osatzeko gomendioa egin die, «hirugarren dosiak nabarmen hobetzen baitu babesa, eta hori erabakigarria izan daiteke arrisku handieneko pertsonentzat».
 

Omicron BA.4 eta BA.5 azpialdagaiak nagusi

75 urtetik gorakoak dira COVID-19aren tasarik altuena dutenak eta, azken asteotan, Omicron BA.4 eta BA.5 azpialdagaien patroia da nagusitzen ari dena. Hortaz, birus aldagai berri honen kontra lehendik infekzioa pasatu izanak ez duela erabat babesten ohartarazi dute osasun agintariek.

Ospitaleetako okupazioak ere gora egin du joan den astean. Ekainaren 19an 75 paziente zeuden ospitaleratuak, eta ekainaren 26an 77. Gainerakoan, ZIUan ospitaleratutako kopuruan (bi pertsona) ez zen aldaketarik izan.
 

Joan den astean 6 hildako COVID-19agatik

Joan den astean Nafarroan sei pertsona hil ziren COVID-19aren ondorioz, baina ez zen inor ospitaleratu zainketa intentsiboetako unitatean.
 

Txertoa hartzeko hitzorduak

Osasunbideak gogorarazi du adin-talde guztiendako dagoela zabalik txertoa hartzeko zitazioa, eta ahal dela, online kudeatuko dela, citasalud.navarra.es webgunean. Posta elektronikoz ere egin daiteke, citas.vacunacion@navarra.es helbidearen bidez, edo telefonoz 948 370 130 Iruñeko Osasun Barrutirako.

Gomendioak bidaiatu behar izanez gero

Oro har, Europar Batasuneko herrialde gehienek, tartean Espainiak, kendu egin dute COVID ziurtagiri digitala aurkezteko betebeharra, sartzeko baldintza gisa.

Nolanahi ere, herrialde batzuetan, emandako dosi bakoitzaren egiaztagiria eskatzen ari dira. Horregatik, Osasun Sailak gomendatzen die bidaiatzen duten pertsonei, txertaketa-ziurtagiria eramateaz gain, osasun-karpetan dagoen EBren txertaketa-ziurtagiria ere deskargatzea, eman zaizkion dosi guztiak zehaztuta.

Edonola ere, Osasun Sailak gomendio hirukoitza egiten du:
  • ez bidaiatu COVID-19arekin bateragarriak diren sintomak agertzen badira;
  • txertaketa-jarraibide osoa emana izatea;
  • atera baino lehen, helmugako herrialdeak eska ditzakeen baldintza partikularrak eta egoera epidemiologikoa kontsultatzea.

Europar Batasunaren Re-open EU webgunean, Europako herrialdeetako osasun eta bidaia neurriei buruzko informazioa kontsulta daiteke, berrogeialdiaren eta bidaiarientzako proben betekizunak barne. Informazioa maiz eguneratzen da eta hogeita lau hizkuntzatan dago eskuragarri.

Europar Batasunetik kanpo bidaiatuz gero, bidaiei eta COVID-19ari buruzko informazioa Osasun Ministerioaren webgunean edo Atzerri Ministerioaren webgunean ere kontsulta daiteke.

 

 

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun