Korrikaren bueltan, Bor-Bor Bortzirietako euskaltzaleen mugimenduak, Bortzirietako Euskara Mankomunitateak eta UEMAk Bizkarsoro filmaren emanaldiak antolatu dituzte Bortzirietan. Ortzirale honetan, adibidez, Arantzan ikusteko aukera izanen da. Euskararen aurkako jazarpenaren eta euskaldunen bizitzeko gogoaren historia kontatzen du Josu Martinezen filmak.
Sunbillako Ulibeltzak elkarteak urteko batzarra eginen du martxoaren 15ean, ortziralean 19:30ean hasita egoitzan. Gai zerrendari dagokionez, azken aktaren irakurketa, elkarterako mugikorra, bestak, mailegua, kuotak, ordainketak diruarekin, bazkide berria eta junta berria aztertuko dituzte, galdera eta eskarien txandaren aitzinetik. Eguneko akta irakurri eta, hala erabakitzen bada, onartuko dute, azkenik.
Lesakako musika bandak kalejira eginen du martxoaren 15ean, ortziralean, 20:00etan hasita. Musika Lesakako txoko guztietara eramanen du bertze behin.
Gazteluko Herriko Ostatuak kontzertua antolatu du ortziralerako. Dei talde gipuzkoarrak 'Iluneko su arrotz' diskoa aurkeztuko du. Kontzertua 20:00etan izanen da ostatuan bertan.
Martxoan eginen dute eta izena emateko epea otsailaren 29an bukatuko da. Lesakako Beti Gazte elkarteak joskintza tailerra antolatu du berriz ere, oraingoan martxoaren 4an hasi eta hilabete batez. Kurtso osorako prezioa 5 eurokoa da eta Beti Gazteko bazkideei irekitako ikastaroa da.