Martxoaren 2rako, larunbata, bertso bazkaria antolatu dute Erratzun. Xabat Illarregi, Oihana Iguaran eta Sustrai Colina ariko dira bertsotan.
Korrika kulturalaren baitan, Zapotxin pailazoaren emanaldia izanen dute martxoaren 2an, Goizuetako Herriko Etxeko ganbaran, 17:30etik aurrera. Sarrera librea izanen da. Markel Oiarzabal idazle eta artista hernaniarra sartzen da pailazoaren paperean eta «ongi pasa eta lagun berriak egiteko asmoz» omen dabil plazaz plaza.
Lapurdi 1609 elkarteak bertso saioa antolatu du larunbaterako Senperen. Larraldea etxean izanen da 19:00etan, eta Joanes Illarregi eta Amets Arzallus ariko dira kantari.
Bor-bor Bortzirietako Euskaltzaleen Mugimenduak antolatuta, Bizkarsoro pelikula emanen dute Bortzirietako bortz herrietan. Lehenengo emanaldia Etxalarren izanen da, larunbatean.
Denok Bat merkatarien federazioak antolatutako hitzorduan, Baztan-Bidasoko hamaika establezimenduk parte hartuko dute. Martxoaren 2an eta 3an, goizez eta arratsaldez, Doneztebeko Ezkurra pilotalekuan eginen dute.