Azienda gustuko dutenek Merkatuko plaza izanen dute bilgune ortziralean, denetik ikusteko aukera izanen baita. Azkeneko urteetan 150 ardi inguru, 100 bat behor eta zaldi, 50 poni inguru, 20 bat behi buru, 10 bat asto eta 4-6 zerri bildu dira, eta aurten ere horrelako kopuruak edo gehiago espero dituzte. Laxoko frontoian, berriz, nekazaritzako makinak, tresnak eta lanabesak izanen dira nagusi.
Pilotazaleek hitzordu berezia izanen dute ortzirale arratsaldean, Aspeko bi partida izanen baitira 18:00etan Baztan pilotalekuan. Lehenik Mata eta Erostarbe, De la Fuente eta Gaskueren kontra arituko dira. Gero, Ezkurdia eta Rezusta, Zabala eta Zabaletaren kontra. Sarrerak salgai daude Futbolin ostatuan eta entradasfronton.com webgunean 30 eurotan.
Saharaztan
Horrez gain, Saharaztan elkarteak tonbola solidarioa paratuko du ferietan. Oporrak Bakean programarako dirua biltzea du helburu egitasmoak, heldu den udako oporretan etorriko diren haur saharar errefuxiatuen hegazkin txartelak ordaintzeko.
Tonbolarekin laguntzeko deia egin die elkarteak Xareta, Baztan, Malerreka, Bertizarana eta Bortzirietako komertzio, elkarte, sortzaile eta bertzelako eragileei. Adierazi dutenez, ez dute dirurik hartuko, baina erosketa edo deskontu bonuak bai, baita opariak ere, hala nola, jatekoak, arropa, jostailuak eta liburuak.
Antolatze lanak errazte aldera, urriaren 11ra arte paratu zuten haiekin harremanetan jartzeko epea. Harremanetan jarri direnek feriak arte izanen dute oparia emateko astia. Horrez gain, elkarteak sortutako materiala ere izanen da salgai postuan: kamisetak, metxeroak, boligrafoak eta mandatuak egiteko poltsak.
