Uda opor garaia izaten da batzuentzat, lanerako tenorea bertzeentzat. Aurtengoa, ordea, ezohikoa izanen da guztientzat.
Maiatz hondarrean 856 langabetu zeuden, iaz baino %27,22 gehiago
Mugimendua beheiti, langabezia goiti
Covid-19aren ondorioz, jende pilaketak saihesteko neurriak hartzen ari dira eskualdeko hainbat udal: bestarik ez ospatzea, igerilekurik ez irekitzea... erabaki dute batzuek.
Horrek guztiak eragin zuzena izanen du eguneroko martxan eta, mugimenduak beheiti egitearekin batera, orain arte udan sortu diren lanpostu kopuruak ere beheiti eginen du.
Iazko langabezia datuei erreparatuz, martxoan 749 langabe zeuden eskualdean eta ekain hondarrean 623 ziren Doneztebeko enplegu zerbitzuan izena emana zutenak. Hiru hilabetez, langabeziak %16,82 egin zuen beheiti.
Aurtengo martxo hondarrean 787 langabe ziren, joan den urtean baino 38 gehiago; apirilean 838 lagun zeuden eta langabezia iazkoa baino %22,51 handiagoa zen eta maiatzean 856 ziren izena emana zutenak, 2019an baino %27,22 gehiago. Azken hiru hilabeteotan, beraz, langabe kopurua %8,77 hazi da.
Otsailetik maiatz hondarrera %15,68 hazi da langabe kopurua
Kalteak alor guztietan
Kaltetuak izan direnen artean daude, bertzeak bertze, bestaz besta ibiltzen diren zerbitzari eta musikariak, baita sorosle edo monitore lanetan aritzen direnak ere. Iñigo Aldazabal Zamarreño (Bera, 1989), Izaskun Iparragirre Etxartea (Elizondo, 1981) eta Eki Gereka Amunarriz (Zubieta, 1995) eragina sumatzen hasiak dira. Izan ere, Aldazabalentzat udako soldata «osagarria» den arren, hortik «diru-sarrera nabarmena» lortzen du; elizondoarrarentzat musika «laguntza handia» da; eta zubietarrari «urtean zehar bidaiatzeko edo planak egiteko askatasuna» ematen dio. Baina hori baino gehiago ere bada. Bizi dutena, maite dutena eta gustuko dutena egiteko aukerarik ez dute izanen.
