Aratz Barandiaran, Leitzako Torraspapel lantegiko enpresa batzordeko idazkariak TTIPI-TTAPAri jakinarazi dionez, gaur 16:00etan bilduko dira langileak, eta bozketa bidez erabakiko dute hemendik aurrera zer egin: «mahai gainean dagoena onartu edo grebarekin jarraitu».
Torraspapel lantegian urtebete daramate lan hitzarmenik gabe, eta hain zuzen, hitzarmen «duina» sinatzeko «negoziazioak blokeatuta» daudela eta, bost eguneko greba egin zuten ilbeltzean eta otsailean. Jarraipen zabala izan zuten ilbeltzaren 30ean, otsailaren 2an, 5ean, 8an eta 12an egindako deialdiek.
Otsailaren 23an, berriz, greba mugagabearekin hastea erabaki zuten zuzendaritzarekin egindako bilerek fruiturik eman ez zutela ikusita ,eta geroztik greban daude langileak. Otsailaren 26an manifestazioa ere egin zuten Leitzako kaleetan eta oso erantzun ona izan zuen.