Lan hitzarmen «duina» sinatzeko «negoziazioak blokeatuta» daudela eta, Leitzako Torraspapel lantegian bost eguneko greba abiatu zuten ilbeltzaren 30ean. Aurreneko grebak langileen aldetik erantzun ona izan zuen, eta otsailaren 2an egin zuten bigarren greba egunak ere jarraipen zabala izan zuen. Joan den larunbatean, otsailaren 5ean, egin zuten hirugarrena, eta Aratz Barandiaran enpresa batzordeko idazkariak jakinarazi duenez, «erabatekoa izan zen geldialdia. Inork ez zuen lanik egin». Horrez gain, «errelebo aldaketetako kontzentrazioetara langile asko azaldu zen: 70 bat goizean eta eguerdian eta 40 bat gauean». Greba egunetan errelebo aldaketa guztietan lantegi sarreran biltzen dira.
Gaur laugarren greba eguna dute Leitzako lantegian, eta «momentuz, produkzio guztia geldi» dagoela adierazi du Barandiaranek. Larunbaterako egina dute bosgarren eta azken deialdia, otsailaren 12rako.
