Bortzirietako emakumeekin* koordinatu eta eskualdeko berdintasun politiketan parte hartzea bultzatzeko deitu du Batzorde Irekia Bortzirietako Berdintasun Zerbitzuak. Otsailaren 26an, astelehena, izanen da bilera 18:00etan Beralandetan, eta Bortzirietako mugimendu feministako kideak eta eskualdeko emakume* guztiak deitu dituzte parte hartzera.
Tokiko komertzioaren berrikuntza, ekintzailetza eta belaunaldi erreleboa helburu, Emplea Fundazioak eta Lesakako udalak sustatutako informazio bilera eginen dute otsailaren 26an, astelehenean 14:00etan udaletxeko pleno aretoan, Erronka: Lesakako hirugarren sektorea biziberritzen goiburupean.
Goldatz Berako Emakume Talde Feminista martxoaren 8rako egitaraua osatzeko lanean ari da, eta horretarako laugarren bilera irekia eginen dute heldu den astelehenean, otsailaren 26an. Beralandetan elkartuko dira 19:30ean, eta bilerara joateko deia luzatu dute.
Azken urteetan bezala, Arbolaren Eguna ospatzeko asmoa du aurten ere Lesakako Beti Gazte elkarteak. Lesakako udalaren, Irain eskola publikoaren eta Tantirumairu ikastolaren laguntza du ekitaldi hau antolatzeko.