(E)LARIK / -(E)NEAN. Denbora (aldiberekotasuna) adierazten du esaldi hauetan -(E)LARIK menderagailuak:
- Gurasoak etorri direlarik, alde egin duzu (edo direnean).
- Sei urte nituelarik hasi nintzen eskolara (edo nituenean).
- Leihotik erori zelarik, hanka hautsi zuen (edo zenean).
Denborazko -(e)nean menderagailuaren parekoa da horietan.
Denboraz bertzelako nozioak (modua, kausa, azalpena, baldintza) ere adierazten ditu esaldi hauetan:
- Hain ona delarik, nola ez maita?
- Zu nirekin zarelarik, ez naiz inoren beldur.
- Radarrak jarri direlarik, autoen abiadura motelduko da.
(E)LARIK / -(E)LA. Biak erabiltzen ahal dira adizki burutugabeekin.
- Irakaslea sartzen zeLARIK (zeLA), ume guztiak isildu egiten ziren.
- Atezaina hurbildu zitzaien, eskuan linterna zeramaLARIK (zeramaLA).
Baina aditzen adizki burutuekin, -(E)LA ez da erabiltzen. Halakoetan, -(E)LARIK erabili behar da.
- Partida bukatu zeLARIK (*zeLA), txaloka hasi ginen.
- Leihotik erori zeLARIK (*zeLA), hanka hautsi zuen.
Tradizio urrikoak dira, eta maiz kalko desegoki baten ondorio, honelakoak:
- *Leihotik erori zen, hanka hautsi zuelarik > Leihotik erori zen, eta hanka bat hautsi / Leihotik erori, eta hanka hautsi zuen). [Okerra dela entenditzen da baldin hori dioenak Leihotik erori zen eta hanka hautsi zuen adierazi nahi badu].
*Oharra: Izartxoa dutenak ez dira zuzenak.