*Nafar Gobernua ala Nafarroako Gobernua?

Tradizioan herritar-izenak osatzeko erabili izan da gehienbat -ar atzizkia (eta -tar (-dar), -ztar aldaerak). Baina zenbaitetan atzizki hori oker erabiltzen da. Zein kasutan?

Tradizioan herritar-izenak osatzeko erabili izan da gehienbat -ar atzizkia (eta -tar (-dar), -ztar aldaerak): igantziar, elgorriagar, aresoar, oiztar, oieregiar… Herriei ez ezik herrialdeei eta kulturei ere erantsi zaie, konparazio batera, Erromatar Inperioa edo txinatar kultura. Joera adierazteko ere baliatu izan da: ezkertiar, eskuindar…

Baina zenbaitetan atzizki hori oker erabiltzen da:
 *Amaiurtar karrikak > Amaiurko karrikak
 *Lesakar auzoak > Lesakako auzoak
 *Aniztar gasna > Anizko gasna
 *Valentziar laranjak > Valentziako laranjak

Euskaltzaindiak erran bezala, «erdaren bide arrunt bati itsu-itsuan jarraikiz eratuak» dira. Lekuari erreferentzia egiten diotenez, euskarazko adierazpide normalak ‘Amaiurko karrikak’ eta ‘Lesakako auzoak’ dira. 

Bertzetik, -ar atzizkia leku-izenari eranstekoa denez, ez dira egokiak leku-izenaren zati bati, erdal herritar-izenari edo erdal herritar-izenaren parte bati euskal atzizkia erantsita lortzen diren hibridoak. Horren adibide dira hauek:
 *Europear > europar
 *Katalandar > katalan
 *Pakistaniar > pakistandar
 *Kanadiar > kanadar

Berriaren Estilo Liburuan ongi aski azaldua dutenez, alkate eta bertze karguak aipatzean nongo erabili behar da, ez nondar. Gauza bera gertatzen da erakundeekin.
 *Alkate beratarra > Berako alkatea
 *Frantziar presidentea > Frantziako presidentea
 *Nafar Gobernua > Nafarroako Gobernua

*Izartxoa dutenak gaizki daude.

TTIPI-TTAPA da Nafarroa Garaiko mendialdean dagoen euskarazko hamaboskari bakarra, eta zu bezalako irakurleen babesa behar du aitzinera egiteko.


Izan zaitez harpidedun