Sustrai Erakuntza fundazioak prentsara bidalitako ohar baten bidez jakin zuten aranztarrek eta Arantzako Udalak parke eolikoaren proiektuaren berri eta herritarrak antolatzen hasi dira. Joan den asteburuan, gaiarekin kezkatuta, herritar talde batek deituta, gaiari buruz solas egiteko batzarra egin zuten gorapean, eta igande honetan, apirilaren 2an, berriz bilduko dira.
Aldi berean, Arantzako Udalak proiektuari buruzko informazioa eskatu zuen Nafarroako Gobernuko ingurumen eta industria departamentuetan. Industria Antolamenduaren, Azpiegitura Energetikoen eta Meatzeen Zerbitzuko Zuzendariaren erantzuna hartu zuen; Arantzan egin nahi duten parke eolikoari buruzko baimen eskaerarik edo dokumentazio teknikorik ez dutela hartu erranez, baina 2022ko azaroan Zelena Renovable S. L. U. enpresak bi berme ekonomiko jarri zituela baieztatuz. Berme horietako bat Ezkurra, Eratsun, Saldias eta Beintza-Labaienen egin nahi duten proiektuari dagokio eta bertzea Etxalarko, Igantziko, Sunbillako eta Arantzako lurretan egin nahi duten proiektuari. Berme ekonomiko horiek nahitaezkoak dira energia sarera konektatzeko baimena izateko. Egun batzuk lehenagotik baieztatu zuen Sustrai Erakuntza fundazioak Bortzirietan eta Malerrekan parke eolikoak egin nahi dituen enpresak energia sare elektrikora konektatzeko baimena lortua duela.
Bertzetik, Nafarroako Gobernuak Arantzako Udalari emandako erantzun horren bidez jakin dira bi proiektuen izenak zein diren: Irakurri instalazioa Ezkurra, Eratsun, Saldias eta Beintza-Labaienen egin nahi dutena eta Azkua instalazioa Etxalarko, Igantziko, Sunbillako eta Arantzako lurretan egin nahi dutena. Irakurri Ezkurrako mendi baten izena da eta Azkua Etxalarko mendi baten izena.
Proiektu bakoitza 50 megawattekoa izanen litzateke, eta energia Iberdrolaren Bidasoko azpiestazio elektrikora bideratzeko izanen litzateke.
Azkua mendiaren inguruak
Irakurri mendiaren inguruak
