Goizean zabaldu du TTIPI-TTAPAk Arantzako, Etxalarko, Igantziko eta Sunbillako lurretan parke eolikoa egiteko proiektuak ezinegona sortu duela Arantzan. Aldi berean, Arantzako Udalak «prentsa bidez jakin duen proiektuari buruzko informazio guztia» eskatu zuen joan den astean Nafarroako Gobernuko ingurumen eta industria departamentuetan. Bada Arantzako Udalak berriki jakinarazi du Nafarroako Gobernuko Industria Antolamenduaren, Azpiegitura Energetikoen eta Meatzeen Zerbitzuko Zuzendariak emandako erantzuna.
Honela dio gobernuaren erantzunak: ez dutela Arantzan egin nahi duten parke eolikoari buruzko baimen eskaerarik edo dokumentazio teknikorik hartu, baina 2022ko azaroan Zelena Renovable S. L. U. enpresak bi berme ekonomiko jarri zituela. Berme horietako bat Ezkurra, Eratsun, Saldias eta Beintza-Labaienen egin nahi duen Irakurri izeneko proiektuari dagokio eta bertzea Etxalarko, Igantziko, Sunbillako eta Arantzako lurretan egin nahi duen Azkua izeneko proiektuari. Berme ekonomiko horiek nahitaezkoak dira energia sarera konektatzeko baimena izateko.
Horrekin batera, Sustrai Erakuntza fundazioak baieztatu bezala, proiektu bakoitza 50 megawattekoa izanen litzateke, eta energia Iberdrolaren Bidasoko azpiestazio elektrikora bideratzeko izanen litzateke. Sustrai Erakuntza fundazioa bera izan zen enpresak energia sare elektrikora konektatzeko baimena lortua duela jakinarazi zuena.
Azkua mendiaren inguruak
Irakurri mendiaren inguruak
